Pasang

ANGNGAP

  • Bagikan
ANGNGAP
Foto: Istimewa

Maddha paongga damena. Aneko malem, pon.”

“Ca’na sapa seyang? Garowa’ arena pon ngamera. Addha duliyan!”

Pasang

Mano’ tharas amonye. Bannya’ dara ngabber kalaban sabangan rampet. Anye-monyean.

“Dika olle barampa taleyan damena?”

“Pon bikan, gi? Aneko pon ta’ kellar se metonga. Lehlah pon. Aneko pon badha kobi saceret ehelan sakaleyan.”

“Baaa padha, aneko pon kaburu dhapa’a ka roma.” Se kadhuwa mole samarena maongga dame ke pikep. Se kadhuwa pagguna mole kalaban sapedha jengkina. Lebat jalan se lamba’ elebadi bila mangkada asakola.

“Mon lamba’ ta’ enggi, bila asakola neko lebat dhiya, aneka e dhiya lecen onggu. Ta’ pon sanonto pon epaping.”

“Tape aneko banne ta’ lecen, aneko e dhinto bilugan, pas toronan nocceng. Mon ta’ ngastete, mon rimohu lam ya’ kul (errimma ta’ makan) enggi juldhengngan ka jurang ganeko.”

Dika enga’, se gi’ lamba’ mega’ juko’ e soksok garowa. Enggi se elabadi buru. Garowa lamba’ kan soksok, aengnga ngalemes, mera ro. Baji’, pas kateppadan e dhitemoranna ganeko sakone’, badha aeng se bagus, jenneng, pas badha juko’na. Bula kalaban dika mega’a juko’na. Ta’ nyambi panceng, ta’ nyambi jaring, molena asakola. Masa’ dika loppae, bari?”

Teppa’ ganeko buku-buku se epanolese pangajaran gi’ ebaddhai plastik. Ta’ pon na’-kana’ sanonto, buku egindhung kalaban tas. Enggi, lamba’ plastik celleng garowa se sanonto ekagabay bundu’na rebba bila marena sarwa (tahlil). Otaba plastik se lang-bellang rowa. Bila ojan aleng-leng. Lebat ka dhaja, pas kalao’, polana Songay Sok Parse se magarimengan garowa tadha’ galadhagga. Tako’ elanyo’ ba’a mon paggun maksa. Kalambi, buku, sapatu epasettong ka dhalem palastik se mera. Kadhang gi’ eyajak mega’ mano’. Mon jan-ojanan mano’ leppos kakabbi ta’ kellar buru. Ja’ rengan pon bacca. Bila mano’ pon bacca, ta’ kellar angngap balakkadan. Enggi pon kare nyargep. Enggi kadhang maske badha ollena mano’, padhana mano’ addhas, gantong cowet, enggi dhapa’ ka roma epakane caca, ban paggun lebur se nyareya pole kalagguwanna!

Padhana bila nyare duwa’, bila molena asakola, banne nyare duwa’, badha settong ganeko ta’ enneng nae’. Ta’ bangal sakale mon e’-nae’an. Enggi ngantos e baba, daddi kotempa. Enggi tadha’, gunna eberri’ bigina duwa’na, pon mele ebaba. Mele reng-kerrennga se pon karetho’. Tape na’-kana’ ganeko sele’ bariya mata bila badha duwa’ soso. Mon ka duwa’ buter, ta’ pate endha’ sakale. Empon, kasangnga mera. Ja’ rengan kalambi pote, esoro nyambi palastik ta’ endha’. Soro bundu’ kalaban dhaunna jate, enggi ta’ tao se mundu’a. Kalambina mera, dhapa’ ka romana egiggiri. Dhapa’ ka romana epakane caca.

Mole asakola. Dhapa’ ka bengkona. Agante kalambi. Mangkat pole, ngalas. Enggi nyalalat rowa. Kadhang nyambi petthat. Enggi metthat nape bai. Jang sele’an. Kadhang enggi jambu epetthat. Enggi bila masana duwa’ ganeko enggi paggun entar molong duwa’. Bila masana lajangan, enggi kaso se agabaya lar-olaran, lajangan, poko’na paggun erajai sanajjan aso-mosowan kalaban na’-kana’ sakola’an bara’anna. Teggalla Man Burawi ekagabay lapanganna adduwan kope’an. Kadari tadha’ tegguna ka buwana billa. Enggi, ekala’ lecangnga. Enggi lamba’ kae endha’ ka billa, garowa ekenneng kakan. Nyaman ca’na. enggi banne lecangnga se ekakan. Lakone kakan lecangnga ma’ tolos!

***

Molena asakola lebat teggalla man Burawi, e bara’ dhajana gadhiya badha jurang. Ombut, kose. Mon maso’ ka gadhiya, mabaringbingan. Berrit pajat. Na’-kana’ se gunna aomor pettong taon ballung taon, ta’ ebagi ngop-nyongop ka gadhiya, manna ekakan olar se alengker e bungkana Koddhu’ Alas. Ca’na, olarra dujan ka na’-kana’ se gi’ ta’ ballik, nape pole ta’ asonnat. Na’-kana’ lamba’ buru asonnat bila ra-kera kellas tello’ otaba kellas lema’ ibtida’iya. Sela bariya ta’ pate asakola. Bila na’-kana’ mole kadibi’an ta’ lebat teggalla Man Burawi, tako’ ebaltok olar macan se nalpe’ e bungkana koddhu’ alas. Are ganeko, bungkana tarebung aguli noro’agi gulina angen. dhaunna dalupang bay-lambayyan. Dhari dhalem jurang se berrit ganeko ekaeding kajana oreng se aserro, akantha ngos-ngosanna sape. Kacong se lebat kadibi’an ajalan lelere, ngabas ka attas, alenga’ ka bungkana koddu’ alas, pola olar mella’, meddek. Tadha’ sape, olar ta’ etengngale e bungka’an. Kacong ganeko gi’ nga’-lenga’an. Pekkeranna atanya, e dhimma asalla monye rowa. Aba’na se apangara nae’a ka bungkana duwa’ se ja-raja ganeko abak kobater, ngendhek. Tako’ badha olar. Badha jambu gaggar, saenggana dhaun ngataras. Baraksak! Kacong ganeko takerjat.

“E dhissa’ rowa biyasana panyaba’anna sape.” Oca’ ganeko akelbu’ dhalem pekkeranna. Se aropa’agi dungngeng dhari oreng towa se biyasa acator marena Isya’. Tape ganeko sabban, gi’ TP ta’ bannya’). Kacong ganeko sajan terro se maso’a ka jurang, sanajjan aba’na gi’ ta’ asonnat, sanajjan badha kaseyalan se agumbel dhalem pekkeranna. Tako’ ecalbak olar. Bila enga’ terrosanna dungngeng panyaba’anna sape, oreng se nyakse’e ja’ badha sape e gadhiya biyasana olle roko’.

Taon-taon ganeko, argana roko’ cap ‘Gudang Buja’ ballu’ saeket ropeya, otaba roko’ cap Tampar (Oepet) argana 3,25 ropeya. Kacong ganeko terro keya olleya roko’ cap ‘Gudang Buja’. Tape aba’na apangrasa, ja’ aba’na banne bajingan. Antara tako’ ebentak maleng otaba ebaltok olar, agalindeng dhalem dhadhana. Monyena nyaba kalowar ka dhalem sajan santa’. Aba’na abali, ongga dhari jurang ganeko. Aba’na bali’ molonga duwa’ se ja-raja se badha e tabun bara’na jurang. Aba’na pajat kodu abuwang kalaban kaleng. Kodu penter ta’ la-nyala ka kaleng, manna ekaromo’. Manna burung se ngakana duwa’ soso. Tape aba’na ja-ngaja asabab terro. Manna paggun daddi kotempa, ta’ enneng nae’ sakale. Buru dhapa’ ka cangka mor lao’na, badha balarak gaggar: “dhuwas.. jendharrr!!!” Aba’na takerjat, cangka se etongko’e paddu mor lao’na potong. Soko kanganna agattong. Ja’ senga tanangnga ta’ neggu’ ka cangka se laen, bisa delbusan ka jurang se bannya’ carangnga ganeko. Aba’na sajan seyal. Pangarana acallonga, sakeng todhus ban tako’ egiggiri mon oreng-oreng se dhateng.

Monyena serro (antara oreng aserro otaba serrona sape) paggun ekaeding. Kadhang asella taserna’, bato’. Kacong ganeko nyoba’ ngancan kalaban bato ka jurang ganeko. Garaksak! Dhaun-dhaun alobang. Serep. Tadha’ serro pole. Kacong ganeko nga’-lenga’an pola badha ca-kancana se pon dhateng asakola keya. Molae gella’ kabadha’an sajan seppe. Mon ngabas ondhungnga are, tantona kancana pon padha mole, bisa lebat Sok Parse otaba lebat Buju’ Tamone. Gaggarra kacong ganeko mole keya.

“Dina abaliya pole, nyambiya cettheng, malle ta’ ageddha’an ka kalambi.” Oca’an sambi ajalan mole. “Malle sajan nyaman se ngottho’a kalaban buja.” Kacong ganeko mole. Monyena kentong epanoto laro pon amonye. Badha se pon nokduk bajut. Kacong ganeko paggun ajalan lelere. Tako’ labu mon laju epagancang, polana jalanna gi’ juk-galijjuk, bannya’ batona. Kadhang gi’ badha ramo’na jate ngalange jalanna, badha bato ajaringgi’.

Kacong ganeko lebat ka ranggun, se dhimma biyasana akompol bila mangkadha asakola abareng. E ranggun ganeko tadha’ kancana sakale. Badha sowara gariyung. Akaton ca-kancana buru dhateng. Tape kalambi sakola’anna pon agante.

“Ba’na ngetek dhimma molae gella’, ma’ buru dhapa’ dha’ enna’? Senga’ nyorne’, ya!”

“Buh, mon jareya ngadibi’ana jagana, laju ta’ jag-ajagan. Neng dhimma gella’ jareya. Mon badha bur-leburan badha e adha’.”

“Ma’ padhana jajjalang. Areya sambi apa ekacareta, kana’? Sengko’ gella’ tako’ se lebada jurang se badha bungkana koddhu’ alassa!”

“Ba’na gella’ mole kaadha’, nyorne’ oreng ano kan. Mara ngako ba’na sateya!”

“Sengko’ gella’ ngala’a duwa’, areya gi’ ta’ dhapa’ ka roma, tako’ tabalaccar. Ma’ badha rembak nyaman ta’ ebalai.”

“Bila sateya o-mata’ tao.”

“Ca’na edhissa’ pangetegganna sape? Gella’ gun ngedhing serrona sape.”

“Jarowa banne serrona sape, Morbis! Mara patao ka colo’na sape ban embi’ celeng!”

“Aiiii ma’ manggara’ ka sengko’, ja’ rengan sengko’ gunna nyareya duwa’!”

“Ma’ laju gunna duwa’ malolo ba’na elajjai. Kassa’ duli asalenan. Areya molae gella’ ngantos ba’na kadibi’. Mara nengguwa sape aserro pole. Ngedhingngagiya serrona. Ngalorkor dhalem dhadha kose. Ta’ kera ta’ ekaloskos!”

Kacong ganeko mangkat masekat malle lekkas agante asalenan kalambi. Dhapa’ ka bengkona gi’ egiggiri mon oreng towana polana ta’ duli mole. Kacong akarettek, pangara ngakana, mala epakane caca, ereken ta’ kaburu entara ka jurang, ngala’a duwa’!

“Iya mangkat pole kassa’, embi’na ta’ enyareyagi pakan sakale jareya.” Oca’na mama’na kacong ganeko. Ban kacong ganeko pon maleccot e budhina romana ka bara’ dhaja.

“Buh ma’ kose abit, gi’ nyoso pole ya, gi’ korang nyoso baddiyanna.” Kacong ganeko ekoca’e kancana.

“Mara mangkat laju, areya malem la. Dhaggi’ gunna olle lampadda. Ta’ etapak. Polana na’-kana’ dhaja jurang dujan keya ka duwa’.” Na’-kana’ ganeko mangkat, ta’ loppa nyambi petthat ekasongkel, ajalan sambi mele baliker.

“Ja’ nger-enger. Manna ekaedhing ja’ badha oreng nengguwa.” Napa’ ka tegalla Man Burawi, badha oreng ngare’, peltong para’ possa’a.

“Para’ olleya ngare’ pon, Nye?”

“Enggi. Adhakdhaga dhamma, Cong?”

“Aneka ngala’a duwa’, Nye.”

“Senga’, ngastete ne’-nae’an, sanonto locanan. Polana me’ teppa’ ka randha tello neko, Cong!”

Na’-kana’ ganeko akompol e bana duwa’. Monye serroan se ngombar dhari dhalem jurang pon ta’ ekaedhing.

“Gella’ jareya peltongnga esaba’ e bungkella bungkana jate e dhissa’ rowa. Sateya mare, la’anan.” Oca’na settong na’-kana’ ato’-koto’.

“Dina ayu’ ngala’ duwa’.”

Bula ban dika neko lamba’ dujan ajaga duwa’.
—————————–

Galtomas, 1441 Hijriah

Penulis: Mat ToyuEditor: Redaksi
  • Bagikan

Tinggalkan Balasan

Alamat email Anda tidak akan dipublikasikan. Ruas yang wajib ditandai *