Laggi' Ngodha, Mahasiswa INSTIKA Paneka Bajjra Adagang Pulsa

Saloka kona: Adagang adaging

Laggi' Ngodha, Mahasiswa INSTIKA Paneka Bajjra Adagang Pulsa
GUMBIRA: Zainuddin bakto naneng oreng le-melleya (Hayat - Sinergi Sumenep)

SUMENEP, SINERGI MADURA - Ponapa se ekalako mahasiswa, magarsare asal Disa Tamba'agung Tengnga, Kacamadan Ambunten, Songennep, Jaba Temor kadhinto kengeng kerana daddi kaca kebbang monggu dha' ca-kancana se laen.

Maske kabilang gi' ta' kose dibasa onggu, namong karana neyat se raja ka'angguy masenneng reng seppona, abanto madhammang kawajibanna reng towana, mahasiswa semester akher neng e fakultas tarbiyah, Institut Ilmu Keislaman Annuqayah (INSTIKA) Luk-guluk, Songennep paneka rajja ajajuwalan pulsa kalaban mokka' counter dibi'.

“Sengko kodu mandiri,” saodda Zainuddin, bakto epanggi'i neng e konterra, lerres neng e penggir Jalan Ambunten, Disa Tambaagung Tengnga, Ahad (14/2/2021).

Zainuddin, lanceng se babar lerres e taon 1998 paneka laggi' aktif noro' orgnanisasi Pergerakan Mahasiswa Islam Indonesia (PMII). Ngabidi dhari bisnis ne'-kene'an; adagang pulsa, kartu perdana tor but-parabuttepon handphone laenna, Zainuddin samangken bisa ekoca' kana' bajjra; ampon kellar majaga counter dibi'.

Ehlas, ngongguwagi sajja ka'angguy kasaeyan aba'na dibi', ta' todhusan, bangalan, aba'na tatak mokka' usaha karana nyoppre kaodhi'an se bhakal dhateng ta' pagguna kantha mangken. Saka'dhinto, nyoppre kaodhi'anna onggu tera' tor samporna e bingkeng are.

Jujur Zainuddin acareta, “saongguna,” caepon, "mokka' usaha paneka bannya' coba'anna, ponapa pole aba' pajat katoronan reng ta' andhi', coma abandha pangaterro, tanto buto ate se jumambar, ate se parjuga tor lembu' panggaliyan," ca'epon.

Salaenna gapaneka, aba'na ngako kodu penter nyare cara, nalektegi pan-saponapan pokpara se ekera bisa mamaju daganganna. Akadiya, kadiponapa tengka se samastena e naleka naneng oreng le-melle.

“Kodu tao carana mabunga atena oreng, baramma cara oreng se pas terro abaliya pole,” totorra.

Saka'dhinto kerana sala settong sabab se ampon ngeba aba'na kalonta monggu dha' magarsare sakacamadan Ambunten.

Amolae Jajuwalan Hape Baba'an neng e Pesbuk

Zainuddin nyamana. Zain ologanna. Pasalla adagang molae gi' buru akuliya. Molae adagang kalaban ajuwal hape baba'an e Marketplace Facebook. Bila badha se messen, Zain ajanjiyan neng e settong kennengngan ka'angguy nyerra'agi barangnga. E ka'dhinto aba'na ngako bannya' olle pangajaran kadiponapa nyangsarana alajjai oreng se melleya daganganna; ajar mateppa' aba' sopaja bisa sabbar ngadhebbi cem-macemma babategga oreng.

“Tor kadhang bila apanggi, enggi badha'an se maburung, parembagan se la potos burung ta' potos. Eba-tambai, se napana rowa rosak, nekona rosak, poko' nemmo bai bila pon ta endha',” oca'na.

Zain aropa'agi pottra se sareyang dhari dhuwa' sataretan pottraepon Abdul Rasyad sareng Rasyidah. Aba'na ta' toman pegga' pangarep sanajjan kodu mangkat angadha'an dhari biyasa mahasiswa sakanca'anna mangkat ka kampus. Paneka ekalampa, asabab badha oreng se melleya daganganna. Dhari paneka aba'na ajar baramma carana ngator bakto.

“Tantona buto ora' lebbi. Kodu penter magi bakto antara ajalannagi bisnis tor kodu mamare tugas kuliya,” ca'epon.

Sanajjan ekarassa berra' tor kadhang momet, aba'na paggun barenteng tor terros ajar magi bakto.

“Sakabbinna oreng tanto padha andhi' bakto pa' lekor (24) jam dhalem sa'arena. Tanto jamma sengko' bariya keya, ta' kera lebbi,” oca'na sambi sem-mesem balibis. 

Seyang malem Zain terros apekker kadiponapa carana bisnis se pagguna ajalan, tape kawajiban nyare elmo jugan ta' olle pegga' e tengnga jalan.

Lerres e taon 2019 se tapongkor, Zain amolae mokka' counter, adagang cem-macemma parabudda (aksesoris) hape kalaban bandha se pajat esempen dibi'.

Metorot panggaliyanna, omor ngodha, ora' badha banne ka'angguy en-maenan otaba coma neng-sennengan, napa pole coma sakadhar ma'abi' dhi'-andhi'na orengtowa. Sanajjan aba'na ngakoe, ja' reng adagang ca'epon banne parkara gampang.

Zain notorragi, ja' aba'na kodu abalangngaja makompol bandha tor masanat tengka laen samacemma sabellunna onggu-onggu majaga counter dibi'. Sapaneka aba'na se laggi' ngodha, kodu tao carana neggen napso, majemjem pekker tor panggaliyan.

Oreng se andhi' panggaliyan dagang ca'epon kodu bisa ngabas, tao ka kabar sambi terros no'-ngono'e kene' ngetek badhana settong kasempadan. Langkong-langkong bisa maca tor ngarte dha' kabutowanna masyarakat.

“Enggi kodu oneng ka pasar, ngagali ka pangaterrona oreng, patabari, sadhiyai. Oreng mangken terro ka hape cara nape, kodu oneng, jugan kodu oneng ka bar-kabar anyar se sakerana bisa ngontongngagi,” ca'epon.

Sa'amponna lastare epekker kalaban juntrong tor yakin, tanto kalaban arembak sabellunna sareng oreng towa dhuwa' tor ca-kancana, kalaban neyat se loros tor ikhlas, aba'na motos ka'angguy duli majaga counter dibi'.

“Sengko' kodu mokka' counter dibi', baramma'a bai carana, bakal katebanan resiko apa bai, sengko' kodu mokka' konter dibi',” oca'na.

Sanajjan coba'an tor tantangan se eyadhebbi langkong berra' etembang majalan dagangan neng e Pesbuk, asabab buto modal se ta' sakone', aba'na panggun tatak. Tantangan kasebbut ta' egarassa lebat mela kabarentengannepon; eyongguwagi.

Asel temmo asel. Akantha ramo' alokae bato, ta' cokba adagang hape second, samangken Zain ampon bisa mokka' counter dibi'. Agiba bajjra.

Sambi Adagang, Kodu Awisuda Taon Mangken

Monggu Zain, odhi' kodu mampo makala bakto, ngajine aba' kantos bisa matondhu' napso sambi terros agi'-gigi' omor se gi' cekka' e badan kalaban sajja se raja, ahlak se lowes tor parjuga, tor se ta' olle kalep enggi paneka namen prinsip, ja' saongguna aba' paneka kadibi' (mandiri).

Sabarinto jugan, ca'epon Zain, sarattepon oreng se terro bajjra'a ajalannagi bisnis. Enggi paneka kodu sabbar alajjai oreng se melle, saenggana oreng se melle aromasa langkong eyargai, aromasa nyaman, bunga entar ka counterra, betta.

Salaenna kodu sabbar, petotorrepon Zain, aba' jugan kodu ajaga kaparcaja'anna oreng. Barang se ejuwal pajat onggu barang se teppa' tor ta' cala, ta' kengeng makoceba oreng se melleya.

Samangken, berkat kabarentenganna, e sabban bulan Zain ampon bisa olle ontong kantos jutaan; cokop ka'angguy dha'aran re-sa'are, majar obang sakola'an, tor kadhang bila badha lebbina, sakone'a, ejuluwagi dha' reng seppona.

“Alhamdulillah tekka hajat. Berkat du'ana bangaseppo, dagangan reya terros odhi', kaperte abuwa kajembaran. Sala settongnga enggi bisa majar kuliah dibi'. Sakejja laggi' ampon bakal awisudha,” atotoran perak.

“Taon sateya sengko' kodu awisuda. Papakon akher kuliah, skripsi kodu mare. Ma' olle lekkas ranta,” totok caretana. (yt/oy/md/fd)


(*)