SAPA TAO

Sanja'na Soe Marda Paranggana

SAPA TAO
Ilustrasi (Istimewa)

1
Sapa tao pagi' bakal ecabbur ka sowarga
Ladina tekka' abut-jibut dusa
Oreng-oreng padha baji' ka tengkana
Tape Pangeran ce' sennengnga dha' aba'na

Ba'na padha nyangka tadha' jalan sowargana
Ba'na padha ngacaca juba' tengkana
Sapa tao karettek dhalem
Badan bang-sebangnga

O
Sapa tao 
Sapa tao
Sapa tao

Ba'ari' oreng jareya pajat rosak
Lagguna, sapa bangal nebbak karep
Maca gulina karettek, o

Saguli enneng sakabbinna
Ate kalaban badanna

Pergem
Pergem
 
Sapa tao cethak dhaggi' egaggari
Tamanco'na mano'

(Rajekke
Kadhang pajat
Baceng padhatengnga)

Eee

Sapa tao 
Sapa tao
Sapa tao

2
Arowa' pao ngodha eyanyo' ba'a
Bilis mardha rak-orakan e bungkana
(Omorra apandha'an ban karebba)

3
Ajam sape esambelli sabban are
Koceng abudhu' gan tatello', gan lalema'
Dhu arapa ajam sape paggun bannya'
Koceng rangrang e ma-roma yong-meyongan

Eee

Sapa tao
Sapa tao
Sapa tao

4
Perreng tampor buko
Esareya ka man-dhimman

Sello' akek jaman
Ebelliya maske larang

Kerres lake'-bine' dhu ja' pesa
Ajja' porop laban dunnya

O

Kakapper ambar ka amper
Sanat kobi gulek e cangker
Oreng jau bakal nyander neter

We-rowe e babungkan amonyeyan
Ngolok ojan para' seyang

Seset maloko' e bubungan
Ngala' panebba, ondur ba'na babbaja

Eee

5
Pana tae ngabber ka lao'
Tokangnga badha e dhaja

Lagguna se kadhuwa akabin
Sadhumalem, settong daddi din-dadin
Dhari jauna esojjin

Dhu, dhu dhu dhu dhu
Sapa tao Sapa tao Sapa tao

Gi' ta' ranta gabak bengkona
Gi' ta' akole' se ekennengana
Tong-settong, sabarundhut, bangka, bangka

6
E jaraja nyae mate odhi' pole
E jalau' kae sakte gaggar mate

7
Sapa rowa nambi' tarnya'
Pamesemma ce' manessa
Sela towa andhi' ana'
Tengka ressem ta' apangrasa

8
Balarak kolare tarebung manyang
Baras mare tedhung nyaman

Sariya nuriya rohanna rohanni
Loppa maos mempe ne-banne

9
Asmana saba' e ate
Dikkerra kelbu' ngastete

Sapa tao
Sapa tao
Sapa tao

Pong sateya leng paenga'
Sanja' paneka pongkas sanga'



Totosan, 1 Rejjeb 1442